Våarome lij akte bæjhkoehtimmie Ööhpehtimmiedirektoraateste stillemen mietie Maahtoedepartemeenteste evtiedimmien bïjre lierehtimmiefaalenasseste goh dåarjoe skuvli barkosne antisemittismen, tjïertevidtjien jïh ov-demokraateles vuajnoej vööste. Bæjhkoehtimmie lij illedahke Eidsvåg-moenehtsen reektehtsistie Det kan skje igjen (2011) jïh Bïevn. St. 22 (2010-2011) noeredaltesen bïjre.
Voestes kuvsjepaahkesne faalenassen maadthåssjaldahkem naemhtie hammode:
Kuvsjepaahken nomme Dembra: demokraateles riejriesvoete tjïertevidtjien jïh antisemittismen vööste. Kuvsjen maadthåssjaldahke lea våajnoes nommesne. Åvtelhaarvoeh jïh ekskludeereden vuajnoeh jieliemassem åadtjoeh ov-jearsoesvoeteste jïh domtesistie «ålkoestamme» årrodh, jïh våaromem vadta narrahtimmide. Dan åvteste skuvlesne demokratiseereden barkoe, feerhmeles ektievoetine, meatannænnoestimmine jïh laejhtehks dijalogine, aaj vierhtieh marginaliseeremem, sïerredimmiem jïh trïegkenassem hööptedh. Skuvlen hööptije barkoe ij leah akte lissiehtasse skuvlen jeatjah barkose, men bielie maadthbarkoste: learoehkidie jirredebiejjien seabradahkese ryöjrehtidh.
Doh voestes vïjhte skuvlh Dembra’ine eelkin tjaktjen 2013. 2016 raejeste Dembra lea nasjonaale faalenassine sjïdteme, seamma tïjjen goh Det Europeiske Wergelandsenteret veelji ij sov barkoem råajvarimmesne jåerhkedh. Daan biejjien govhte raeffie- jïh almetjereaktajarngh ovmessie bieline laantesne Dembra faalehte: Raftostiftelsen Vestlandesne, ARKIVET freds- og menneskerettighetssenter Sørlandesne, Nansen Fredssenter Innlandesne, Falstadsenteret Gaske-Nöörjesne, HL-senteret Østlandesne jïh Narviksenteret Noerhte-Nöörjesne.
Daan biejjien raajan 155 skuvlh, jienebh goh 4300 lohkehtæjjajgujmie, bihkedimmiem jïh kuvsjem åådtjeme Dembran tjïrrh (2023). Dembran tjïrrh lohkehtæjjaööhpehtæmman 13 lohkehtæjjaööhpehtimmieinstitusjovnh meatan orreme profesjovnemaahtoem jïh vierhtieh evtiedidh mejtie studeenth, learohkh jïh lohkehtæjjah edtjieh nuhtjedh (2023). Dembra lea vihkeles posisjovnem åådtjeme faagefeeltesne hööpteme åvtelhaarvojste skuvlesne, jïh Dembran nedtesijjie, dembra.no, lea vihkele gaaltije gusnie lohkehtæjjah, lohkehtæjjastudeenth jïh lohkehtæjjaööhpehtæjjah haarjanimmieh jïh faageaamhtesh gaevnieh.
