Duogážin lei almmuhus man Oahpahusdirektoráhtta almmuhii Máhttodepartemeantta diŋgojumiin, ahte ovddidit oahpahusfálaldaga doarjjan skuvllaide eastadit antisemittismma, nállevealaheami ja eahpedemokráhtalaš guottuid. lmmuheapmi lei čuovvoleapmin Eidsvåg-lávdegotti raportii “Det kan skje igjen” (Dat sáhttá fas dáhpáhuvvat) (2011) ja Stuoradiggedieđáhusa čuovvoleapmin ST 22 (2010-2011) nuoraidskuvladási birra.
Vuosttaš kursapáhkas hábmejuvvo fálaldaga vuođđojurdda ná:
Kursapáhka namma lea Dembra: Demokráhtalaš gearggusvuohta nállevealaheami ja antisemittismma vuostá. Namma speadjalastá kurssa vuođđojurdaga. Ovdagáttut ja olggušteaddji guottut mielddisbuktet eahpedorvvolašvuođa ja dovddu ahte lea olggobealde, ja addet vuođu loavkašuhttimiidda. Danin leat skuvlla demokráhtavuolggaheaddji bargu, oktan fátmmasteaddji searvevuođain, mielmearridemiin ja kritihkalaš gulahallamiin, maiddái váikkuhangaskaoamit movt sáhttá eastadit marginaliserema, vealaheami ja cielaheami.
Vuosttaš vihtta skuvlla álge Dembrain 2013 čavčča. 2016 rájes lea dembra sturron ja šaddan riikkaviidosaš fálaldahkan, seammás go Det Europeiske Wergelandsenteret válljii ahte ii joatkke iežas áŋgiruššamiin doaimmas. Dál fállet guhtta ráfi- ja olmmošvuoigatvuođaguovddáža iešguđet guovlluin riikkas Dembra: Raftostiftelsen Oarje-Norggas, ARKIVET freds- og menneskerettighetssenter lulli-Norggas, Nansen Fredssenter Innlandet:s, Falstadsenteret gaska-Norggas, HL-guovddáš Østlandet:s ja Narviksenteret davvi-Norggas. Dembra.no almmuhuvvui maid vuosttaš geardde 2016:s, ja dain čađahuvvo stuorát revideremat 2019:s ja 2023:s. Neahttabáikkis leat nuvttá oahpporesurssat sihke skuvllaide ja oahpaheaddjeohppui.
Dássážii leat 155 skuvlla badjel 4300 oahpaheddjiin ožžon bagadallama ja kurssa Dembra čađa (2023). Dembra bokte oahpaheaddjioahpu várás leat 13 oahpaheaddjeoahppoinstitušuvnna leamaš mielde hábmeme profešuvdnagelbbolašvuođa ja resurssaid maid geavahit studeanttaide, ohppiide ja oahpaheddjiide (2023). Dembra lea ožžon dehálaš posišuvnna skuvllas, ovdagáttuid eastadeami fágasuorggis, ja Dembra neahttabáiki, dembra.no lea dehálaš gáldu hárjehallamiidda ja fágadieđuide oahpaheddjiide, oahpaheaddjioahppostudeanttaide ja allaskuvlaoahpaheddjiide.
