Duogásj li Åhpadusdirektoráhta almodibme mav Máhttodepartemænnta li diŋŋgum mij guoskaj dahkat åhpadimláhtjusav doarjjon skåvlå bargguj antisemittisma, rasisma ja iehpedemokratijjalasj guottoj vuosstij. Almodibme lij tjuovvolibme Eidsvåg-nammadusá rappårtå Det kan skje igjen (2011) ja Meld. St. 22 (2010-2011) nuorajdáse birra.
Vuostasj kurssapáhken tjielggiduvvá fálaldagá vuodoájádus návti:
Kurssapáhke namma l Dembra: demokratisk beredskap mot rasisme og antisemittisme. Namma tjielggi kursa vuodoájádusáv. Gátto ja guotto ma iehtjádijt ålgoldi nanniduvvi gå ij la jasska jali dåbddå ietjas "ålgusjbielen", ja dassta ihkap bahojdime sjaddi. Danen la skåvlå demokratijjalasj barggo, masi gullu sebrudahtte aktisasjvuohta, liehket fáron mierredit ja lájttális ságastallama, váj máhttá hieredit marginalisierimav, nuppástimev ja nálsodimev. Skåvlå hierediddje barggo ij la duodden skåvlå dåjmajda ietján, valla oassen guovdásj dåjmas: oahppijt ihttásj sebrudahkaj nannit.
Vuostasj vihtta skåvlå álggin Dembrajn 2013 tjavtja. 2016 rájes la Dembra vijdeduvvam nasjåvnålasj fálaldahkaj, sæmmi båttå gå Det Europeiske Wergelandsenteret válljijin ettjin sidá dåjmajn joarkket. Uddni fálli guhtta ráfe- ja almasjrievtesvuodaguovdátja lándav miehtáj Dembra: Raftostiftelsen Vestlandetin, ARKIVET freds- og menneskerettighetssenter Sørlandetin, Nansen Fredssenter Innlandetin, Falstadsenteret Gasska-Vuonan, HL-senteret Østlandetin ja Narviksenteret Nuorttalij-Vuonan. Dembra.no almoduváj vuostasj bále jagen 2016, viehka rievdaduváj jagijn 2019 ja 2023. Næhttabielen li nåvkå oahppamressursa sihke skåvlåjda ja åhpadiddjeåhpadussaj.
Udnásj bæjvváj li 155 skåvlå badjel 4300 åhpadiddjij Dembra baktu bagáduvvam ja kursajt oadtjum (2023). Åhpadiddjeåhpadusá Dembra baktu li 13 åhpadiddjeåhpadusá læhkám fáron profesjåvnnåmáhtudagáv ja ressursajt åvddånime studentajda, oahppijda ja åhpadiddjijda (2023). Dembra l oadtjum ájnas posisjåvnåv fáhkasuorgen hieredimijt binnedit skåvlån, ja Dembra næhttabájkke dembra.no la ájnas gálldo hárjjidallamijda ja fáhkadiedojda åhpadiddjijda, åhpadiddjestudentajda ja åhpadiddjij skåvllijiddjijda.
