Darjomen bïjre
Ulmie
- Ussjedadteme guktie aevhkieh jïh ovmessie byjngetje faktovrh maehtieh jïjtse jïh mubpiej jieledem baajnehtidh.
Ryöjredimmie
Veedtjh våålese jïh tjaelieh olkese råållakåarhth jïh lahtesh. Tjuara råållakåarhtide bietskedh guktie fïerhte almetje jïjtse kåarhtem åådtje. Maahta aaj kåarhtide kopijeeredh guktie jienebh seamma kåarhtem åadtjoeh.
Daate haarjanimmie nuekie stoerre tjïehtjelem kreava guktie gaajhkesh maehtieh loevtlaaketjh tjåadtjodh vïedtjen mietie.
Tjïrrehtimmie
Åejviebielie
Rollekort til Ett skritt frem
- 1
Bïejh stovlh jïh buertieh svïegkesasse, jïh bööredh learoehkidie/studeentide gaskoeh tjïehtjelasse båetedh. Gaajhkesh plæjjohkem jallh paehperem meatan vaeltieh.
- 2
Råållam åadtjodh
Tjïelkesth gaajhkesh edtjieh råållam åadtjodh maam edtjieh veele goerehtidh. Joekedh råållakåarhtide, guktie gaajhkesh råållam åadtjoeh mij lea goh vuestiebielie dej rïektes maadtose.
Birrh learoehkidie /studeentide tjihkedidh jïh veelelaakan lohkedh abpe råållam maam leah åådtje. Birrh dejtie jïjtje veeljedh göökte vielie væhtah, mejtie edtjieh tjaeliestidh lissine dejtie væhtide mejtie leah åådtjeme.
- 3
Jïjtjemse råållan sïjse bïejedh
Ihke gaajhkesh edtjieh jïjtjemse råållan sïjse bïejedh jïh råållam toelhkestidh, birrh dejtie ussjedidh guktie jielede lea «dej råållaalmetjidie»: Magkeres gåetesne jallh jollegåetesne årroeh? Guktie gåetesne dej luvnie vååjnoe? Guktie aarkebiejjie vååjnoe, maam almetje iehkeden jïh astoeaejkien dorje? Maam fuelhkie ektesne dorje? Jnv.
NB: Daate edtja ajve åssjaldahkide gåaskodh, ij edtjh vaestiedasside reegkesgïeline jiehtedh.
- 4
Raajrosne tjåadtjodh.
Birrh dan mænngan learoehkidie/studeentide tjuedtjielidh, tjaelemedalhketjidie meatan vaeltedh jïh akten bealan tjïehtjelistie vaedtsedh jïh raajrosne tjåadtjodh.
- 5
Heannadimmiem lohkedh jih sïllem åvtese vaeltedh
Soptsesth datne edtjh akti akti tsiehkiem jallh heannadimmiem lohkedh. Jis vienhtieh tsiehkie sjeahta don råållaalmetjasse maam leah åådtjeme, edtjieh aktem sïllem åvtese vaeltedh. Fïerhten sïllen åvteste maam vaeltieh, aktem sïevem aarhkese beaja. Eah edtjh maam jiehtedh, edtja eevre sjaevehts årrodh. Learohkh/studeenth maehtieh aaj åssjaldahkh tjaeliestidh mejtie åadtjoeh. Vedtieh astoem toelhkestidh (sjaevehtsvoetesne) fïerhtem lahtesem maam lohkh.
- 6
Gellie sillh?
Gosse gaajhkh lahtesh lohkesovveme, birrh fïerhtem learohkem/studeentem saarnodh man gellie sillh dah leah vaalteme. Dan åvteste naakenh guhkebe sïllh mubpijste darjoeh, staeredh almetji sijjiem guktie dah mah jeenjemes sïllh veeltin, guhkebe åvtene tjåadtjoeh, jnv. Birrh dejtie mah dov uvte tjåadtjoeh, jarkedh, guktie gaajhkesh åadtjoeh vuejnedh gusnie doh jeatjebh tjåadtjoeh.
- 7
Moenedidh duekien
Gihtjh learoehkidie/studeentide mejtie maehtieh maam akt moenedidh duekien jallh væhtaj bïjre mejtie doh jeatjebh leah åådtjeme. Baajh naakenh jallh gaajhkesh dovnesh, jearohke tïjjeste jïh låhkoste, duekien jïh væhtaj bïjre soptsestidh mejtie åadtjoejin.
Minngemes ussjedadteme:
Minngemes ussjedadteme
- Guktie daam haarjanimmiem dååjrih?
- Mannasinie vïenhth mijjieh dam darjoejimh?
- Dååjrih datne naan aejkien fer sööjmes sjïdtih jallh fer guhkie dej mubpiej åvtene böötih? Guktie domti?
- Haarjanimmie saetnies guvviem vadta guktie mijjen duekie, jïh jeatjah bielieh mijjen jieliedistie, ektesne spielieh jïh mijjen nuepieh baajnehtieh?
Gyhtjelassh lohkehtæjjastudeentide jïh lohkehtæjjide:
- Guktie dov learohki duekie jïh jieledetsiehkie maehtieh viehkiehtidh dej akademihkeles jïh sosijaale eaktoeh baajnehtidh?
- Guktie datne goh lohkehtæjja maahtah dov learohki ovmessie daerpiesvoeth krööhkestidh duekien jïh jieledetsiehkien bïjre?
- Maahta seamma haarjanimmiem darjodh learohkigujmie?
- Mïsse byöroe dellie ussjedidh?
- Mij learohkenåhtoe maahta årrodh?